main KHayal hun kisi aur ka mujhe sochta koi aur hai
SALEEM KAUSAR
maiñ ḳhayāl huuñ kisī aur kā mujhe sochtā koī aur hai
sar-e-ā.īna mirā aks hai pas-e-ā.īna koī aur hai
maiñ kisī ke dast-e-talab meñ huuñ to kisī ke harf-e-duā meñ huuñ
maiñ nasīb huuñ kisī aur kā mujhe māñgtā koī aur hai
ajab e’tibār o be-e’tibārī ke darmiyān hai zindagī
maiñ qarīb huuñ kisī aur ke mujhe jāntā koī aur hai
mirī raushnī tire ḳhadd-o-ḳhāl se muḳhtalif to nahīñ magar
tū qarīb aa tujhe dekh luuñ tū vahī hai yā koī aur hai
tujhe dushmanoñ kī ḳhabar na thī mujhe dostoñ kā patā nahīñ
tirī dāstāñ koī aur thī mirā vāqi.a koī aur hai
vahī munsifoñ kī rivāyateñ vahī faisloñ kī ibārateñ
mirā jurm to koī aur thā pa mirī sazā koī aur hai
kabhī lauT aa.eñ to pūchhnā nahīñ dekhnā unheñ ġhaur se
jinheñ rāste meñ ḳhabar huī ki ye rāsta koī aur hai
jo mirī riyāzat-e-nīm-shab ko ‘salīm’ sub.h na mil sakī
to phir is ke ma.anī to ye hue ki yahāñ ḳhudā koī aur hai
