त्रिलोकी रो नाथ जाट घर भजन लिरिक्स

काँहि जाणूं लीला श्याम री ,
अजब निराली रे ।
त्रिलोकी रो नाथ जाट घर ,
बण ग्यो हाळी रे ।।

सौ बीघा रो खेत जाट रो ,
राम भरोसे खेती रे ।
आधे में तो गेंहू चणा ,
आधा में धाणा मेथी रे ।
खेत जाट रे बिना बाड़ रो ,
राम रूखाळी रे ।
त्रिलोकी रो नाथ जाट घर ,
बण ग्यो हाळी रे ।।

बाजरा री रोटी जीमे ,
ऊपर घी रो लचको रे ।
पालक री तरकारी सागे ,
भरे मूली रे बटको रे ।
छाछ राबड़ी रो करे कलेवो ,
भर – भर थाळी रे ।।
त्रिलोकी रो नाथ जाट घर ,
बण ग्यो हाळी रे ।।

सुख सूं सोवे जाट जाटणी ,
सोवे छोरा छोरी रे ।
आप सांवरियो खड़ो पहरा में ,
कैयाँ होवे चोरी रे ।
आवे चोर जद चक्कर काटे ,
जावे खाली रे ।।
त्रिलोकी रो नाथ जाट घर ,
बण ग्यो हाळी रे ।।

भूरी भैंस चमकणो पाडो ,
दो छाळी दो नारा रे ।
बिना बाड़ रो खेत जाट रे ,
बांधे न्यारा – न्यारा रे ।
आवे चोर जद ऊभो दीखे ,
देवे गाळी रे ॥
त्रिलोकी रो नाथ जाट घर ,
बण ग्यो हाळी रे ।।

सोहन लाल लौहाकर गावे ,
हरी भजनां में आवे रे ।
धाबळिये री ओट बैठने ,
श्याम खीचड़ो खावे रे ।
भगतां रे संग नाचे गावे ,
दे दे ताळी रे ।।
त्रिलोकी रो नाथ जाट घर ,
बण ग्यो हाळी रे ।।

https://www.youtube.com/watch?v=DLZHBMvoAWo

त्रिलोकी रो नाथ जाट घर, triloki ro nath jaat ke, rajasthani krishna bhajan lyrics, krishna bhajan with lyrics,prakash mali bhajan rajasthani

Leave a Reply