angDai bhi wo lene na pae uTha ke hath
NIZAM RAMPURI
añgḌā.ī bhī vo lene na paa.e uThā ke haath
dekhā jo mujh ko chhoḌ diye muskurā ke haath
be-sāḳhta nigāheñ jo aapas meñ mil ga.iiñ
kyā muñh par us ne rakh liye āñkheñ churā ke haath
ye bhī nayā sitam hai hinā to lagā.eñ ġhair
aur us kī daad chāheñ vo mujh ko dikhā ke haath
be-iḳhtiyār ho ke jo maiñ paañv par girā
ThoḌī ke nīche us ne dharā muskurā ke haath
gar dil ko bas meñ paa.eñ to nāseh tirī suneñ
apnī to marg-o-zīst hai us bevafā ke haath
vo zānūoñ meñ siina chhupānā simaT ke haa.e
aur phir sambhālnā vo dupaTTa chhuḌā ke haath
qāsid tire bayāñ se dil aisā Thahar gayā
goyā kisī ne rakh diyā siine pe aa ke haath
ai dil kuchh aur baat kī raġhbat na de mujhe
sunñī paḌeñgī saikḌoñ us ko lagā ke haath
vo kuchh kisī kā kah ke satānā sadā mujhe
vo khīñch lenā parde se apnā dikhā ke haath
dekhā jo kuchh rukā mujhe to kis tapāk se
gardan meñ merī Daal diye aap aa ke haath
phir kyuuñ na chaak ho jo haiñ zor-āzmā.iyāñ
bāñdhūñgā phir dupaTTa se us be-ḳhatā ke haath
kūche se tere uTTheñ to phir jaa.eñ ham kahāñ
baiThe haiñ yaañ to donoñ jahāñ se uThā ke haath
pahchānā phir to kyā hī nadāmat huī unheñ
panDit samajh ke mujh ko aur apnā dikhā ke haath
denā vo us kā sāġhar-e-mai yaad hai ‘nizām’
muñh pher kar udhar ko idhar ko baḌhā ke haath