asar usko zara nahin hota
MOMIN KHAN MOMIN
asar us ko zarā nahīñ hotā
ranj rāhat-fazā nahīñ hotā
bevafā kahne kī shikāyat hai
to bhī vāda-vafā nahīñ hotā
zikr-e-aġhyār se huā mā’lūm
harf-e-nāseh burā nahīñ hotā
kis ko hai zauq-e-talḳh-kāmī lek
jang bin kuchh mazā nahīñ hotā
tum hamāre kisī tarah na hue
varna duniyā meñ kyā nahīñ hotā
us ne kyā jaane kyā kiyā le kar
dil kisī kaam kā nahīñ hotā
imtihāñ kījiye mirā jab tak
shauq zor-āzmā nahīñ hotā
ek dushman ki charḳh hai na rahe
tujh se ye ai duā nahīñ hotā
aah tūl-e-amal hai roz-fuzūñ
garche ik mudda.ā nahīñ hotā
tum mire paas hote ho goyā
jab koī dūsrā nahīñ hotā
hāl-e-dil yaar ko likhūñ kyūñkar
haath dil se judā nahīñ hotā
rahm kar ḳhasm-e-jān-e-ġhair na ho
sab kā dil ek sā nahīñ hotā
dāman us kā jo hai darāz to ho
dast-e-āshiq rasā nahīñ hotā
chāra-e-dil sivā.e sabr nahīñ
so tumhāre sivā nahīñ hotā
kyuuñ sune arz-e-muztar-e-‘momin’
sanam āḳhir ḳhudā nahīñ hotā