diwaron se mil kar rona achchha lagta hai
QAISARUL JAFRI
Film: Ek hi Maqsad 1988
dīvāroñ se mil kar ronā achchhā lagtā hai
ham bhī pāgal ho jā.eñge aisā lagtā hai
kitne dinoñ ke pyāse hoñge yaaro socho to
shabnam kā qatra bhī jin ko dariyā lagtā hai
āñkhoñ ko bhī le Duubā ye dil kā pāgal-pan
aate jaate jo miltā hai tum sā lagtā hai
is bastī meñ kaun hamāre aañsū poñchhegā
jo miltā hai us kā dāman bhīgā lagtā hai
duniyā bhar kī yādeñ ham se milne aatī haiñ
shaam Dhale is suune ghar meñ mela lagtā hai
kis ko patthar mārūñ ‘qaisar’ kaun parāyā hai
shīsh-mahal meñ ik ik chehrā apnā lagtā hai
