ghazab kiya tere wade pe etibar kiya
DAGH DEHLVI
ġhazab kiyā tire va.ade pe e’tibār kiyā
tamām raat qayāmat kā intizār kiyā
kisī tarah jo na us but ne e’tibār kiyā
mirī vafā ne mujhe ḳhuub sharmsār kiyā
hañsā hañsā ke shab-e-vasl ashk-bār kiyā
tasalliyāñ mujhe de de ke be-qarār kiyā
ye kis ne jalva hamāre sar-e-mazār kiyā
ki dil se shor uThā haa.e be-qarār kiyā
sunā hai teġh ko qātil ne āb-dār kiyā
agar ye sach hai to be-shub.ha ham pe vaar kiyā
na aa.e raah pe vo ijz be-shumār kiyā
shab-e-visāl bhī maiñ ne to intizār kiyā
tujhe to vāda-e-dīdār ham se karnā thā
ye kyā kiyā ki jahāñ ko umīd-vār kiyā
ye dil ko taab kahāñ hai ki ho ma.āl-andesh
unhoñ ne va.ada kiyā is ne e’tibār kiyā
kahāñ kā sabr ki dam par hai ban ga.ī zālim
ba tang aa.e to hāl-e-dil āshkār kiyā
taḌap phir ai dil-e-nādāñ ki ġhair kahte haiñ
aḳhīr kuchh na banī sabr iḳhtiyār kiyā
mile jo yaar kī shoḳhī se us kī bechainī
tamām raat dil-e-muztarib ko pyaar kiyā
bhulā bhulā ke jatāyā hai un ko rāz-e-nihāñ
chhupā chhupā ke mohabbat ko āshkār kiyā
na us ke dil se miTāyā ki saaf ho jaatā
sabā ne ḳhaak pareshāñ mirā ġhubār kiyā
ham aise mahv-e-nazāra na the jo hosh aatā
magar tumhāre taġhāful ne hoshyār kiyā
hamāre siine meñ jo rah ga.ī thī ātish-e-hijr
shab-e-visāl bhī us ko na ham-kanār kiyā
raqīb o sheva-e-ulfat ḳhudā kī qudrat hai
vo aur ishq bhalā tum ne e’tibār kiyā
zabān-e-ḳhār se niklī sadā-e-bismillāh
junūñ ko jab sar-e-shorīda par savār kiyā
tirī nigah ke tasavvur meñ ham ne ai qātil
lagā lagā ke gale se chhurī ko pyaar kiyā
ġhazab thī kasrat-e-mahfil ki maiñ ne dhoke meñ
hazār baar raqīboñ ko ham-kanār kiyā
huā hai koī magar us kā chāhne vaalā
ki āsmāñ ne tirā sheva iḳhtiyār kiyā
na pūchh dil kī haqīqat magar ye kahte haiñ
vo be-qarār rahe jis ne be-qarār kiyā
jab un ko tarz-e-sitam aa ga.e to hosh aayā
burā ho dil kā bure vaqt hoshyār kiyā
fasāna-e-shab-e-ġham un ko ik kahānī thī
kuchh e’tibār kiyā kuchh na e’tibār kiyā
asīrī dil-e-āshufta rang lā ke rahī
tamām turra-e-tarrār taar taar kiyā
kuchh aa ga.ī dāvar-e-mahshar se hai ummīd mujhe
kuchh aap ne mire kahne kā e’tibār kiyā
kisī ke ishq-e-nihāñ meñ ye bad-gumānī thī
ki Darte Darte ḳhudā par bhī āshkār kiyā
falak se taur qayāmat ke ban na paḌte the
aḳhīr ab tujhe āshob-e-rozgār kiyā
vo baat kar jo kabhī āsmāñ se ho na sake
sitam kiyā to baḌā tū ne iftiḳhār kiyā
banegā mehr-e-qayāmat bhī ek ḳhāl-e-siyāh
jo chehra ‘dāġh’-e-siyah-rū ne āshkār kiyā