jab se tu ne mujhe diwana bana rakkha hai
HAKEEM NASIR
jab se tū ne mujhe dīvāna banā rakkhā hai
sañg har shaḳhs ne hāthoñ meñ uThā rakkhā hai
us ke dil par bhī kaḌī ishq meñ guzrī hogī
naam jis ne bhī mohabbat kā sazā rakkhā hai
pattharo aaj mire sar pe baraste kyuuñ ho
maiñ ne tum ko bhī kabhī apnā ḳhudā rakkhā hai
ab mirī diid kī duniyā bhī tamāshā.ī hai
tū ne kyā mujh ko mohabbat meñ banā rakkhā hai
pī jā ayyām kī talḳhī ko bhī hañs kar ‘nāsir’
ġham ko sahne meñ bhī qudrat ne mazā rakkhā hai