kab Thahrega dard ai dil kab raat basar hogi
FAIZ AHMAD FAIZ
kab Thahregā dard ai dil kab raat basar hogī
sunte the vo ā.eñge sunte the sahar hogī
kab jaan lahū hogī kab ashk guhar hogā
kis din tirī shunvā.ī ai dīda-e-tar hogī
kab mahkegī fasl-e-gul kab bahkegā mai-ḳhāna
kab sub.h-e-suḳhan hogī kab shām-e-nazar hogī
vaa.iz hai na zāhid hai nāseh hai na qātil hai
ab shahr meñ yāroñ kī kis tarah basar hogī
kab tak abhī rah dekheñ ai qāmat-e-jānāna
kab hashr muayyan hai tujh ko to ḳhabar hogī