raushan jamal-e-yar se hai anjuman tamam
HASRAT MOHANI
raushan jamāl-e-yār se hai anjuman tamām
dahkā huā hai ātish-e-gul se chaman tamām
hairat ġhurūr-e-husn se shoḳhī se iztirāb
dil ne bhī tere siikh liye haiñ chalan tamām
allāh-rī jism-e-yār kī ḳhūbī ki ḳhud-ba-ḳhud
rangīniyoñ meñ Duub gayā pairahan tamām
dil ḳhuun ho chukā hai jigar ho chukā hai ḳhaak
baaqī huuñ maiñ mujhe bhī kar ai teġh-zan tamām
dekho to chashm-e-yār kī jādū-nigāhiyāñ
behosh ik nazar meñ huī anjuman tamām
hai nāz-e-husn se jo farozāñ jabīn-e-yār
labrez āb-e-nūr hai chāh-e-zaqan tamām
nashv-o-numā-e-sabza-o-gul se bahār meñ
shādābiyoñ ne gher liyā hai chaman tamām
us nāznīñ ne jab se kiyā hai vahāñ qayām
gulzār ban ga.ī hai zamīn-e-dakan tamām
achchhā hai ahl-e-jaur kiye jaa.eñ saḳhtiyāñ
phailegī yuuñ hī shorish-e-hubb-e-vatan tamām
samjhe haiñ ahl-e-sharq ko shāyad qarīb-e-marg
maġhrib ke yuuñ haiñ jam.a ye zaaġh o zaġhan tamām
shīrīni-e-nasīm hai soz-o-gudāz-e-‘mīr’
‘hasrat’ tire suḳhan pe hai lutf-e-suḳhan tamām
