खम्मा खम्मा ओ रामापीर अवतारी भजन लिरिक्स

खम्मा खम्मा ओ रामापीर अवतारी भजन लिरिक्स
khamma khamma o rama peer avtari baba ramdev ji desi bhajan

खम्मा खम्मा ओ रामापीर अवतारी

खम्मा खम्मा ओ रामापीर अवतारी।
कळजुग में महिमा थारी भारी जी ,
महिमा भारी जी ,रामापीर अवतारी।

गजानन जी साय करीजो ,
सादर शीश नवावा जी।
बाबा रा चौबीस परचा ,
जग ने गाय सुनावा जी।
बाबा बड़ो है उपकारी जी।
ओ म्हारो, बाबो बड़ो है उपकारी जी ,
रामापीर अवतारी।
खम्मा खम्मा ओ रामापीर अवतारी।

पेहलो परचो रामदेव जी ,
अजमल जी दिनों जी।
कुंकु पगल्या आंगण मांड्या ,
पाणी दूध कीनो जी।
हो सांवरा, पालनीय पगटया मुरारी जी ,
रामापीर अवतारी।
खम्मा खम्मा ओ रामापीर अवतारी।

दूजो परचो मेणा दे ने ,
रामदेव दिखलायो जी।
दूध उफ़णतो चरु मायने ,
झालो देय ढबायो जी।
हो बाबा, मेटी माता री शंका सारी जी ,
रामापीर अवतारी।
खम्मा खम्मा ओ रामापीर अवतारी।

तीजो परचो रामदेव ,
दरजी ने दिखलावे जी।
कपडे रो घोड़लियो बाबो ,
पकड़ लगाम उड़ावे जी।
बाबे री, बालपने री लीला न्यारी जी ,
रामापीर अवतारी।
खम्मा खम्मा ओ रामापीर अवतारी।

चौथे परचे रामदेव जी ,
भैरव रागस मारयो जी।
धरती पर सु बोझ पाप रो ,
बाबो आप उतारयो जी।
हो म्हारे, बाबा ने पूजे नर नारी जी ,
रामापीर अवतारी।
खम्मा खम्मा ओ रामापीर अवतारी।

पांचवो तो परचो खाती ,
सारथीया ने दिनों जी।
मरियोडा रा हाथ पकड़कर ,
जीवनदान दिनों जी।
बाबा पर, सारथियो जावे बलिहारी जी ,
रामापीर अवतारी।
खम्मा खम्मा ओ रामापीर अवतारी।

छठे परचे बाण्यो बोयतो ,
थाने अरज गुजारी जी।
जहाज डूबती मझधारा में ,
भुजा पसार तारी जी।
भगता री, मेटी थे विपदा भारी जी ,
रामापीर अवतारी।
खम्मा खम्मा ओ रामापीर अवतारी।

सातवो तो परचो लख्खी ,
बिणजारा ने दिनों जी।
झूठ बोलियों रामदेव जी ,
मिसरी लूण कीनो जी।
बिणजारो रो आयो शरण में तिहारी जी ,
रामापीर अवतारी।
खम्मा खम्मा ओ रामापीर अवतारी।

आठवो परचो तो पांचू ,
पीरा ने दिखलावे जी।
मक्का सु भोजन रा कटोरा ,
पल में आप मंगावे जी।
ओ बाबा, पीरा में पदवी भारी जी ,
रामापीर अवतारी।
खम्मा खम्मा ओ रामापीर अवतारी।

नवे परचे रामदेव जी ,
रण में शंख बजायो जी।
पूंगलगढ़ में पड़ियारा रो ,
झूठो गरब मिटायो जी।
हो बाबा, सुगणा ने दुखड़ा से उबारी जी ,
रामापीर अवतारी।
खम्मा खम्मा ओ रामापीर अवतारी।

दशवे परचे नेतल दे ने ,
परचो पीर दिखावे जी।
पगा पांगली नेतल दे ने ,
फेरा माय चलावे जी।
हो राणी, नेतल दे लक्मी अवतारी जी ,
रामापीर अवतारी।
खम्मा खम्मा ओ रामापीर अवतारी।

नेतल दे री सहेलिया ने ,
परचो है दिखलावे जी।
कंवर कलेवो करवा बाबो ,
जद महल में आवे जी।
बाबा री, ग्यारवा परचा री लीला न्यारी जी ,
रामापीर अवतारी।
खम्मा खम्मा ओ रामापीर अवतारी।

मरियोड़ी मित्री ने सखियाँ ,
थाली माहि रखावे जी।
थाली पर सु परदो बाबो ,
पल में आप उठावे जी।
मंजारी, जीवत वे मिनकी भागी जी ,
रामापीर अवतारी।
खम्मा खम्मा ओ रामापीर अवतारी।

बारहवो परचो तो बाबो ,
भाणुडा ने दिनों जी।
सुगणा बाई रो लाल लाडको ,
जिण ने जीवत कीनो जी।
हो बीरा, आरती उतारे बहना थारी जी ,
रामापीर अवतारी।
खम्मा खम्मा ओ रामापीर अवतारी।

तेहरवो परचो तो बाबो ,
बिरमदेव ने दिनों जी।
गाय रो बाछडियो मर गयो ,
जिण ने जीवन कीनो जी।
बाबा रो, सोवन चुटियो है चमत्कारी जी ,
रामापीर अवतारी।
खम्मा खम्मा ओ रामापीर अवतारी।

चोदहवो पर्चा नेतल ने ,
रामदेव दिखलावे जी।
गर्भ में साधो है बालक ,
जिणरी बोली सुनावे जी।
हो बाबा, साँचा है सिद्ध अवतारी जी ,
रामापीर अवतारी।
खम्मा खम्मा ओ रामापीर अवतारी।

पन्द्रहवों परचो हड़बूजी ,
सांखला ने दिनों जी।
जीवित समाधि लिया पछे भी ,
रतन कटोरो दिनों जी।
बाबा ने, जाणे है दुनिया सारी जी ,
रामापीर अवतारी।
खम्मा खम्मा ओ रामापीर अवतारी।

सोलहवो परचो धनिया सु ,
रावलमल दे पायो जी।
जम्मो जगाकर आई रूपा ,
थाली में बाग़ लगायो जी।
हो बाबा, राणी रूपा दे भगत थारी जी ,
रामापीर अवतारी।
खम्मा खम्मा हो रामापीर अवतारी।

सत्तरवें परचे में जरदो ,
जाति बलाई वालो जी।
बारहा बरस तक ऊभो रियो ,
लीले रो रखवाळी जी।
हो बाबा, सूखे कंकाल जान डाली जी ,
रामापीर अवतारी।
खम्मा खम्मा हो रामापीर अवतारी।

महाराणा कुम्भाजी परचो ,
अठारहवो है पायो जी।
मुगला सु मेवाड़ी राणो ,
जंग जीतकर आयो जी।
ओ कुम्भा, बाबा री महिमा बखाणी जी ,
रामापीर अवतारी।
खम्मा खम्मा हो रामापीर अवतारी।

उन्निसवो परचो तो बाबो ,
दल्ला सेठ ने दिनों जी।
शीश जोड़कर धड़ सु बाबो ,
जीवनदान दिनों जी।
हो बाबे, चोटी री राखी सेलानी जी ,
रामापीर अवतारी।
खम्मा खम्मा हो रामापीर अवतारी।

बिसवो परचो तो आंधो ,
साधु सिरोही पावे जी।
रामदेव ने याद करे जद ,
आंखड़ल्या खुल जावे जी।
बाबे री, सेवा में बीती उमर सारी जी ,
रामापीर अवतारी।
खम्मा खम्मा हो रामापीर।

इक्किसवो परचो है भारी ,
हरजी भाटी पावे जी।
अण ब्याही बकरी रा थन सु ,
दूध काढ़कर लावे जी।
हो बाबे, दूध पियो है अवतारी जी ,
रामापीर अवतारी।
खम्मा खम्मा हो रामापीर अवतारी।

बाइसवो परचो तो राजा ,
विजयसिंह जी पावे जी।
कपड़ा रा घोडा ने बाबो ,
दाणो आप खिलावे जी।
बाबा ने, नमिया है हाकम हजारी जी ,
रामापीर अवतारी।
खम्मा खम्मा हो रामापीर अवतारी।

नवलसिंह जी नरेश परचो ,
तेइसवो है पावे जी।
कैद किया जयपुर का राजा ,
बाबो मुक्त करावे जी।
ओ राजा, पावे वे पाछी जागीरी जी ,
रामापीर अवतारी।
खम्मा खम्मा हो रामापीर अवतारी।

माता आसरी बाई परचो ,
चौबिसवो है पायो जी।
धूपदान और चिमटों देखो ,
बाबा सु है पायो जी।
बाबा री, भगती में उमर गुजारी जी ,
रामापीर अवतारी।
खम्मा खम्मा हो रामापीर अवतारी।

( 24 प्रमाण )

है चौबीस प्रमाण आपरा ,
ज्योरा नाम बतावा जी।
भूल चूक होवे तो बाबा ,
थासु माफ़ी चावा जी।
हो बाबा, गलती बगसावो थे तो म्हारी जी ,
रामापीर अवतारी।
खम्मा खम्मा हो रामापीर अवतारी।

पेलो गुरु प्रमाण और दूजो ,
निज प्रमाण कहलावे जी।
सोजी प्रमाण तीसरो चोथो ,
महापद है बतलावें जी।
हो बाबा, पांचवो आगम प्रमाण जाणी जी ,
रामापीर अवतारी।
खम्मा खम्मा हो रामापीर अवतारी।

छठो आगम प्रमाण दुसरो ,
मुगती प्रमाण सातवो जी।
आठवो निज प्रमाण ,
नमो पिंड आपरो जी।
हो बाबा, देशवो है निकलक नेजाधारी जी ,
रामापीर अवतारी।
खम्मा खम्मा हो रामापीर अवतारी।

ग्यारहवो है निजार बाबा ,
अभय प्रमाण बारहवो जी।
योग प्रमाण तेरहवो दाता ,
भक्ति प्रमाण चौदहवो जी।
हो बाबा, पन्द्रहवों ज्ञान गुणकारी जी ,
रामापीर अवतारी।
खम्मा खम्मा हो रामापीर अवतारी।

माया प्रमाण सोलहवीं वाणी ,
मूल आरम्भ सत्तरहवो जी।
भाव प्रमाण अठारहवो है ,
है अवतार उन्निसवो जी।
हो बाबा, बिसवा में महिमा बखाणी जी ,
रामापीर अवतारी।
खम्मा खम्मा हो रामापीर अवतारी।

रज प्रमाण इक्किसवो बाबा ,
बाईस अन्न प्रमाण जी।
तेइसवो है साखी बाबा ,
चौबीस बीज प्रमाण जी।
हो बाबा, जाणे है ज्यां ने दुनिया सारी जी ,
रामापीर अवतारी।
खम्मा खम्मा हो रामापीर अवतारी।

अजमल घर अवतार बापजी ,
आप गुणा री खान जी।
में तो हु अज्ञानी बालक ,
किनविध करू बखाण जी।
हो बाबा, मंदमति है बाबा म्हारी जी ,
रामापीर अवतारी।
खम्मा खम्मा हो रामापीर अवतारी।

लीले रा असवार आपरी ,
महिमा अपरम्पार जी।
मास भादवे गांव रूणीचे ,
होवे जय जयकार जी।
हो बाबा, दर्शन ने आवे नर नारी जी ,
रामापीर अवतारी।
खम्मा खम्मा हो रामापीर अवतारी।

रामदेव बाबा री कीरत ,
दास अशोक सुनावे जी।
चरणा री सेवा में लीजो ,
चरणा में सुख पावे जी।
हो रामा, अरज सुणीजो बाबा म्हारी जी ,
रामापीर अवतारी।
खम्मा खम्मा हो रामापीर अवतारी।

रामदेव जी मारवाड़ी भजन लिरिक्स

khamma khamma o rama peer avtari

moinuddin manchala ke bhajan

Bhajan / Geet(भजन ) == खम्मा खम्मा ओ रामापीर अवतारी
Bhajan Singer/गायक = मोइनुद्दीन मनचला
Bhajan Lyrics Type = भजन Lyrics

Leave a Comment